საქართველოს კონკურენციისა და მომხმარებლის დაცვის სააგენტო(GCCA), 2025 წლის 1 ივლისის მდგომარეობით, სასამართლოში მიმდინარე და დასრულებული დავების მიხედვით მიღებული შედეგების შესახებ მონაცემებს აქვეყნებს.
2014-2025 წლებში, კონკურენციის პოლიტიკის აღსრულების და მომხმარებლის უფლებების დაცვის მიმართულებით მიღებულ გადაწყვეტილებებზე - 61 საქმე გასაჩივრდა. ამავე პერიოდში, 15 დასრულებული სასამართლო დავიდან - 14 სააგენტოს სასარგებლოდ გადაწყდა და სასამართლომ GCCA-ის მიერ მიღებული გადაწყვეტილება ძალაში დატოვა, ხოლო 1 ხელახალი შესწავლისთვის უკან დაუბრუნა.
ამ ეტაპზე, სხვადასხვა ინსტანციაში, მიმდინარეობს 56 სასამართლო დავა, GCCA-ს მიერ მიღებულ 47 გადაწყვეტილებასთან დაკავშირებით. მათ შორის, კონკურენციის მიმართულებით 41, ხოლო მომხმარებლის უფლებების დაცვის მიმართულებით - 15. განხილვის პროცესშია - ნავთობკომპანიების, ფარმაცევტული კომპანიების, კინოთეატრის ბილეთების ონლაინ რეალიზაციის, დაზღვევის - საავანსო გარანტიების საქმე და სხვა.
მნიშვნელოვანია აღინიშნოს, რომ სააგენტოს მიერ მიღებული ნებისმიერი გადაწყვეტილება შესაძლებელია გასაჩივრდეს თბილისის საქალაქო სასამართლოში. სასამართლო არის მნიშვნელოვანი რგოლი, რომელიც GCCA-ს ნებისმიერი გადაწყვეტილების სამართლებრივ კონტროლს უზრუნველყოფს.
