საიტი მუშაობს სატესტო რეჟიმში - ძველი ვერსია
ცხელი ხაზი 598 05 44 22 ცხელი ხაზი 598 05 44 22 ცხელი ხაზი 598 05 44 22

მარეგულირებელი ორგანოების მონაწილეობით კონკურენციის სამართლის აღსრულების საკითხებზე მრგვალი მაგიდა გაიმართა

საქართველოში კონკურენციის პოლიტიკის გაძლიერების, სამართლებრივი აღსრულების გაუმჯობესების და საერთაშორისო, საუკეთესო პრაქტიკის გაზიარების მიზნით, საქართველოს კონკურენციისა და მომხმარებლის დაცვის სააგენტოს ინიციატივით, ეროვნული მარეგულირებელი უწყებების მონაწილეობით, მრგვალი მაგიდა გაიმართა.


ღონისძიება გახსნა და მონაწილეებს სიტყვით მიმართა: კონკურენციისა და მომხმარებლის დაცვის სააგენტოს თავმჯდომარემ, ირაკლი ლექვინაძემ; ეროვნული    ბანკის    პირველმა    ვიცე-პრეზიდენტმა, პრეზიდენტის მოვალეობის შემსრულებელმა, ნათია თურნავამ;     სემეკის თავმჯდომარემ, დავით    ნარმანიამ; დაზღვევის  სახელმწიფო ზედამხედველობის სამსახურის უფროსმა, დავით ონოფრიშვილმა და  კომუნიკაციების კომისიის წევრმა, ეკატერინე იმედაძემ.


„2020 წელს „კონკურენციის შესახებ“ საქართველოს კანონში მიღებული ცვლილებების თანახმად, კონკურენციის ეროვნულ სააგენტოსა და მარეგულირებელ ორგანოებს შორის კომპეტენციის გამიჯვნის მიზნით, შეიქმნა ერთიანი საკანონმდებლო ბაზა.  შესაბამისად, უწყებები კონკურენციის სამართლის ძირითად საკითხებზე ერთიანი პრინციპებით მოქმედებენ. კანონში ცვლილებების ერთ-ერთი მთავარი მიმართულება იყო - ეკონომიკის სხვა მარეგულირებელ უწყებებთან ერთად საკითხების განხილვის და გადაწყვეტის კონტროლის ერთიანი პრინციპების მართვა, რაც ვფიქრობ, რომ განვლილ პერიოდში საკმაოდ ეფექტურად განხორციელდა. დროის ამ მცირე მონაკვეთში, ერთობლივ ფორმატში, ჩვენ არაერთი მნიშვნელოვანი საქმე განვიხილეთ და როგორც ადგილობრივ ისე საერთაშორისო დონეზე ჩვენი ქვეყნისთვის საკმაოდ მნიშვნელოვან პროექტებს ჩავუყარეთ საფუძველი. დღევანდელ შეხვედრაზე, საერთაშორისო საუკეთესო პრაქტიკის გაზიარების მიზნით, ევროპელ ექსპერტებთან ერთად, მიმოვიხილავთ კონკურენციის პოლიტიკის მიმართულებით სამართლებრივი აღსრულების საკითხებს. მადლობა მონაწილეობისთვის, აქტიური ჩართულობისთვის მარეგულირებელ უწყებებს და ევროკავშირის მიერ დაფინანსებული TWINNING-ის პროექტს მხარდაჭერისთვის“, - განაცხადა ირაკლი ლექვინაძემ შეხვედრაზე.


რეგულირებად სექტორებში, ადგილობრივ და საერთაშორისო დონეზე, კონკურენციის პოლიტიკის აღსრულების მექანიზმებზე მოხსენებები გააკეთეს: საქართველოს კონკურენციისა და მომხმარებლის დაცვის სააგენტოს იურიდიული დეპარტამენტის უფროსის მოადგილემ, ირაკლი შაკიაშვილმა; ლიეტუვის კონკურენციის საბჭოს თავმჯდომარის მოადგილემ და საბჭოს წევრმა, მედეინა ავგუსტინავიჩიენე და ავსტრიის კონკურენციის ფედერალური უწყების საქმის მკვლევარმა, ნორა შინდლერმა.


შეხვედრა კითხვა-პასუხის რეჟიმში გაიმართა, სადაც ავსტრიის და ლიეტუვის მაგალითებზე დაყრდნობით, მონაწილეებმა იმსჯელეს  - ენერგეტიკის, კომუნიკაციების, საფოსტო და საბანკო  სექტორში მიმდინარე ტენდენციებზე, გამოწვევებზე, შესაძლებლობებზე და იმ შედეგებზე, რომელიც მარეგულირებელი უწყებებისთვის სტრატეგიულად მნიშვნელოვან საკითხებს წარმოადგენს.


ეროვნული მარეგულირებელი უწყებების მონაწილეობით გამართული მრგვალი მაგიდა ევროკავშირის მიერ დაფინანსებული TWINNING-ის პროექტის მხარდაჭერით გაიმართა.  

05.04.2024
უკან დაბრუნება