UNCTAD-ის მე-9 საერთაშორისო კონფერენციის ფარგლებში, საქართველოს კონკურენციისა და მომხმარებლის დაცვის სააგენტოს თავმჯდომარის ირაკლი ლექვინაძის შეხვედრა გაიმართა Consumers International-ის გენერალურ დირექტორ ჰელენა ლეურენტთან.
მხარეებმა მომხმარებლის დაცვის სფეროში არსებული გლობალური ტენდენციები, გამოწვევები და თანამშრომლობის პერსპექტივები განიხილეს. ირაკლი ლექვინაძემ სააგენტოს 2024-2025 წლების შედეგებსა და მიმდინარე აქტივობებზე ისაუბრა, ყურადღება გამახვილდა რეფორმებზე, მიღწეულ პროგრესზე, ევროკავშირთან ინტეგრაციის პროცესში განხორციელებულ აქტივობებსა და მომხმარებლის ინტერესების დაცვის სტანდარტებზე. ხაზი გაესვა GCCA-ის მიერ, 2026-2027 წლებში, ICPEN-ის პრეზიდენტობის პერიოდში დაგეგმილ აქტივობებს.
განსაკუთრებული ყურადღება დაეთმო სტრატეგიული პარტნიორობის მნიშვნელობას მომხმარებლის უფლებების გაძლიერებისა და სამართლიანი, გამჭვირვალე ბაზრების განვითარებისთვის. ლექვინაძემ Consumers International-ის გენერალური დირექტორი ოფიციალურად მოიწვია 2025 წლის ნოემბერში დაგეგმილ საერთაშორისო კონფერენციაზე „კონკურენცია და მომხმარებლის დაცვა“.
შეხვედრის დასასრულს, მხარეებმა თანამშრომლობის გაღრმავების მზაობა დაადასტურეს. Consumers International 100-ზე მეტ ქვეყანაში მომხმარებლის უფლებების, სამართლიანი ბაზრების, ციფრული ეთიკისა და მდგრადი მოხმარების ხელშეწყობაზე მუშაობს. შეხვედრაში მონაწილეობდა GCCA-ის მომხმარებლის უფლებების დაცვის დეპარტამენტის უფროსი, სერგო სანიკიძე.
